O Club de Raza Can de Palleiro é unha asociación sen ánimo de lucro que se dedica á conservación e promoción da Raza Can de Palleiro.
En 1999 comeza a recuperación da raza ao presentarse ó Plan de recuperación das razas caninas autóctonas de Galicia (España), co apoio da Xunta de Galicia, e comeza a recompilarse documentación ata 2002, ano no que xurde a asociación para preservar o patrimonio natural da raza.
As principais funcións do Club de Raza Can de Palleiro son:
- Asegurar o crecemento e a consolidación da raza autóctona galega en perigo de extinción Can de Palleiro. O club pon en contacto ós interesados en conseguir un exemplar cos criadores rexistrados de Can de Palleiro para saber se hai camadas dispoñibles, asegurando a pureza racial destes e coidando da súa saúde morfolóxica e psicolóxica.
- Supervisar as camadas programadas, para que as crías cumpran as características estándar da raza.
- Facer un seguimento controlado de tódalas camadas rexistradas, realizando probas de ADN a cada un exemplares nados.
- Realizar avaliacións ós cans a partir dos 18 meses que lles permita a súa reprodución e entregarlles o “pedigree” de raza a través do Libro Xenealóxico da Raza. Este custo o asumen os propios criadores.
- Fomentar a cría e adquisición responsable para evitar cruces de raza.
- Realizar campañas de difusión e comunicación para dar a coñecer a raza Can de Palleiro, a través de redes sociais ou anuncios coma este, que serviu para promocionar a raza autóctona galega fóra da comunidade autónoma.
- Traballar en proxectos de investigación para coñecer en profundidade as características e o comportamento do Can de Palleiro e fomentar así a súa conservación. A data de 12 de marzo do 2021 existen rexistrados 2.841 exemplares.
O club tamén forma parte de FEDERAPES (Federación de razas autóctonas Español) que vela pola biodiversidade dos animais domésticos en España.
A asociación funciona cunha estrutura asamblearia, na que os socios e socias poden participar e votar nas decisións que se toman dende a asociación e poden participar nas actividades e proxectos a desenvolver, fomentando unha relación directa, participativa e de confianza cos propietarios dos cans. Ademais, os socios obteñen descontos e recomendacións de marcas asociadas ao club.
Para colaborar co club de raza Can de Palleiro podes:
- Facerte socio por 30€ anuais
- Adquirir un exemplar de Can de Palleiro
- Facer unha doazón
- Adquirir un produto na tenda online para ti ou para regalar
Se queres colaborar coa asociación, preme nesta ligazón.
Fonte de referencia: https://www.youtube.com/watch?v=nbtAdtL1ZPQ
