Camadas

Antes de cubrir o formulario de solicitude, rogámoslle que lea atentamente a seguinte información. Actualmente existe unha lista de espera para a adquisición de cachorros de Can de Palleiro. O tempo de espera pode variar considerablemente en función do sexo e da cor da capa solicitada.

De maneira orientativa, neste momento:

* Marela: é a capa con menor lista de espera, actualmente estimada entre 8 meses e 1 ano.
* Alobada: a lista de espera supera o ano.
* Negra: presenta unha lista de espera superior ás anteriores, debido a que existe unha menor
poboación de exemplares reprodutores desta capa.

Estes prazos son orientativos e poden variar en función dos nacementos, dos cruzamentos realizados
e da dispoñibilidade de exemplares de cada sexo e capa.

Como funciona a adquisición?

O Club Raza Can de Palleiro non conta con criadores oficiais. Os propietarios dos exemplares rexistrados realizan as crías cando o consideran oportuno, seguindo a información e as recomendacións facilitadas polo Club para a realización dos cruzamentos.
A medida que van nacendo as camadas, desde o Club poñemos en contacto os criadores ou criadoras coas persoas que se atopan na lista de espera.

A partir dese momento, a adquisición do cachorro pasa a ser un acordo exclusivamente entre o criador ou criadora e a persoa interesada. O Club non intervén nas condicións de venda nin establece os prezos dos cachorros. O Club si realiza o seguimento e control dos exemplares e das camadas e encárgase da tramitación correspondente do pedigree ante a Xunta de Galicia, organismo responsable da súa expedición.

Os cachorros entréganse, con carácter xeral, entre as 8 e as 10 semanas de idade, desparasitados, vacinados, identificados mediante microchip, coa súa correspondente cartilla sanitaria e coas probas de ADN dos proxenitores realizadas.

Posteriormente, aproximadamente entre os 2 e 3 meses desde a chegada do cachorro ao seu domicilio, recibirá directamente da Xunta de Galicia o seu pedigree.

Importante: coidado coas ofertas non controladas

É posible atopar en Internet anuncios e ofertas de cachorros de Can de Palleiro que non están controlados polo Club.
Ante calquera dúbida, recomendamos poñerse en contacto co Club ou solicitar ao propietario a
documentación dos proxenitores, así como a documentación relativa á alta e inscrición da camada.
É especialmente importante comprobar que todos estes trámites se realizaron correctamente desde o
inicio.

O Club ten constancia de casos nos que se informa ás persoas interesadas de que, posteriormente, o
Club poderá regularizar ou tramitar a documentación dunha camada que non fose correctamente rexistrada e controlada.
Esta información é falsa.
O Club non pode regularizar posteriormente unha camada que non fose correctamente rexistrada e
controlada desde o seu inicio. Por este motivo, recomendamos informarse adecuadamente antes de adquirir un cachorro e
asegurarse de que tanto os proxenitores como a camada cumpren cos requisitos correspondentes.

Se, despois de ler esta información, desexa continuar coa solicitude e formar parte da lista de
espera, pode continuar co formulario.